अजित पवार गटाचे मंत्री धनंजय मुंडे (Dhananjay Munde) यांचा वाल्मिक कराड (Walmik Karad) हा निकटवर्तीय असल्याने त्यांच्यावर गंभीर आरोप होत आहेत. त्यामुळे मुंडेंच्या राजीनाम्याची मागणी जोर धरत आहे. सामाजिक कार्यकर्त्या अंजली दमानिया यांनी धनंजय मुंडे व त्यांचा सहकारी वाल्मिक कराड याच्यावर आर्थिक गैरव्यवहाराचे आरोप करत उपमुख्यमंत्री अजित पवार यांच्याकडे पुरावे सादर केले आहेत.
दमानिया यांनी याच अनुषंगाने अजित पवारांची भेट घेतली. या भेटीत त्यांनी मुंडे आणि कराड यांच्या आर्थिक संबंधांवर प्रकाश टाकत पुरावे सादर केल्याचे सांगितले. यानंतर दमानिया यांनी इशारा दिला आहे की, जर अजित पवार यांनी धनंजय मुंडेंचा राजीनामा घेतला नाही, तर त्या न्यायालयाचा दरवाजा ठोठावतील.
अजित पवार यांनी याप्रकरणी मुख्यमंत्री देवेंद्र फडणवीस यांच्यासोबत चर्चा करणार असल्याचे सांगितले आहे. या चर्चेत मुंडेंच्या राजीनाम्याचा निर्णय होण्याची शक्यता वर्तवली जात आहे. जर राजीनामा घेतला गेला, तर धनंजय मुंडेंचे राजकीय वर्चस्व कमी होऊ शकते, अशी राजकीय वर्तुळात चर्चा सुरू झाली आहे.
दरम्यान, वाल्मिक कराड याच्यानंतर एका गोळीबार प्रकरणात अक्षय आठवले गँगविरोधात मकोकाअंतर्गत कारवाई करण्यात आली आहे. अक्षय आठवले, सनी आठवले, आशिष आठवले, मनीष क्षीरसागर, आणि ओंकार सवई यांच्यावर कठोर कारवाई झाल्याने बीडमध्ये खळबळ उडाली आहे.