राज्यात नोव्हेंबरच्या दुसऱ्या आठवड्यात दोन टप्प्यात विधानसभा निवडणूक? मुख्यमंत्री एकनाथ शिंदेंचे संकेत | Vidhansabha Election 2024

मुंबई | आगामी विधानसभा निवडणुका (Vidhansabha Election 2024) नोव्हेंबरच्या दुसऱ्या आठवड्यात होण्याची शक्यता आहे. दोन टप्प्यात ही निवडणूक पार पडेल. मुख्यमंत्री एकनाथ शिंदे यांनी वर्षा बंगल्यावर पत्रकारांशी अनौपचारिक गप्पांमध्ये विधानसभा निवडणुकीवर भाष्य केले. यावेळी त्यांनी विधानसभा निवडणूका कधी पार पडतील याचे संकेत दिलेत.

यावेळी त्यांनी मेरिट आणि विजयाची क्षमता असणाऱ्यांनाच उमेदवारी दिली जाईल हा महायुतीतील  जागावाटपाचा फॉर्म्युला असेल असं म्हटलं आहे. ते म्हणाले की, महायुतीतील जागावाटप येत्या ८ ते १० दिवसांत अंतिम होईल. अद्याप निवडणुकीच्या तारखांची घोषणा आयोगाने केली नाही. कदाचित नोव्हेंबरच्या दुसऱ्या आठवड्यात २ टप्प्यांमध्ये निवडणूक पार पडेल.

विजयाची क्षमता आणि चांगला स्ट्राईक रेट यावरच तिन्ही पक्षांमध्ये जागावाटप होईल. आमच्या महायुती सरकारला महिलांचा मोठा पाठिंबा मिळत आहे. जवळपास १.६ कोटी महिलांना राज्य सरकारच्या मुख्यमंत्री माझी लाडकी बहीण योजनेतून अर्थसहाय्य मिळत असल्याचही त्यांनी यावेळी सांगितलं. 

तसेच लाडकी बहीण योजनेतून लाभार्थी महिलांना महिन्याला १५०० रुपये दिले जातात. आम्हाला २.५ कोटी महिलांपर्यंत हा लाभ पोहचवायचा आहे. आमचं सरकार हे सर्वसामान्यांसाठी आहे. महायुती सरकार राज्यात विकास आणि लोककल्याणकारी योजना यात समतोल साधत आहे. आमच्या सरकारचं मुंबईला झोपडपट्टीमुक्त बनवून सर्वांना परवडणाऱ्या किंमतीत घरे देण्याचं उद्दिष्टे आहे असंही मुख्यमंत्री एकनाथ शिंदे यांनी म्हटलं आहे.