कोल्हापूर| ऑलिम्पिकमध्ये कोल्हापूरचा नेमबाज स्वप्निल सुरेश कुसाळेने (Swapnil Kusale) पुरुषांच्या 50 मीटर रायफल 3 पोझिशन्सच्या अंतिम फेरीत टक्कर देत तिसऱ्या क्रमांकावर स्थान मिळवल आहे. पॅरिस ऑलिम्पिकमध्ये कोल्हापूरच्या या पठ्ठ्यानं बाजी मारत कांस्यपदकावर आपल नाव कोरलं. स्वप्निलनं कांस्यपदक मिळवल्याचं समजताच त्याच्या कुटुंबीयांनी आणि गावकऱ्यांनी मोठा जल्लोष केला.
ऑलिम्पिकमध्ये 72 वर्षांनी महाराष्ट्राचा डंका वाजवणाऱ्या स्वप्निलला राज्य सरकार कडून 1 कोटींच बक्षिस जाहीर
पॅरिस इथं सुरु असलेल्या ऑलिंपिकमध्ये कांस्यपदक पटकावणाऱ्या स्वप्नील कुसाळेचं सर्व स्तरातून अभिनंदन होत आहे. राज्य सरकारच्या वतीनं त्याचं अभिनंदन करण्यात आलं असून त्याला एक कोटी रुपयांचे बक्षीस जाहीर करण्यात आलं आहे. स्वप्नीलमुळं कुस्तीमध्ये भारतासाठी वैयक्तिक पहिलं पदक पटकावणाऱ्या खाशाबा जाधव यांचं स्मरण झालं. तब्बल 72 वर्षांनी स्वप्नीलनं महाराष्ट्रासाठी हे पदक पटकावलं आहे. अतिशय प्रतिकूल परिस्थितीत खडतर मेहनत घेऊन त्यानं हे यश संपादन केलं. कोल्हापूर जिल्ह्यात नेमबाजीची एक मोठी परंपरा आहे. ही परंपरा स्वप्नीलनं कायम राखली आहे. कांबळवाडी सारख्या ग्रामीण भागातून येऊन स्वप्नीलनं आपलं राज्य आणि देशाचं नाव आंतरराष्ट्रीयस्तरावर झळकवलं असं म्हणत, मुख्यमंत्री एकनाथ शिंदे म्हणाले.
#LIVE | पॅरिस ऑलिम्पिक स्पर्धेत भारताला तिसरे पदक मिळवून देणाऱ्या स्वप्नील कुसळेशी मुख्यमंत्री एकनाथ शिंदे यांचा संवाद https://t.co/1wUc7Dikmh
नेमबाज स्वप्निल कुसाळेनं 1952 नंतर वैयक्तिक ऑलिम्पिक पदकावर मोहर उमटवली आहे. अतिशय अटीतटीच्या लढतीत स्वप्निलने हे यश प्राप्त केल्याचं समजताच कोल्हापूरच्या राधानगरी तालुक्यातील त्याच्या कांबळवाडी या जन्मगावी दिवाळी साजरी झाली. स्वप्निलनं पदक जिंकल्यानंतर सर्व गावकऱ्यांनी त्याचे वडील सुरेश कुसाळे, आई अनिता कुसाळे आणि भाऊ सुरज कुसाळे यांचं साखर तसंच पेढे भरवून अभिनंदन केलं तर गावकऱ्यांनी फटाक्यांची आतषबाजी करत मोठा जल्लोष साजरा केला.
पॅरिस ऑलिम्पिकमध्ये 50 मीटर एअर रायफल 3 पोझिशन क्रीडा प्रकारात कोल्हापूरचा स्टार नेमबाज स्वप्निलनं कांस्यपदकावर नाव कोरल्यामुळं कोल्हापूरच्या क्रीडा क्षेत्रात आणखी एक मानाचा तुरा रोवला गेला आहे. यामुळं कोल्हापूरकराच्या नावाचा डंका सातासमुद्रापार वाजू लागलाय. यामुळं त्याच्या कुटुंबीयांचा आनंद गगनात मावेनासा झाला असून स्वप्निलच्या घरात गुलाल आणि साखर पेढे वाटून जल्लोष साजरा करण्यात आला. तसंच स्वप्निल मायदेशी परतल्यानंतर कोल्हापूरपासून कांबळवाडी गावापर्यंत स्वप्निलची हत्तीवरुन मिरवणूक काढणार असल्याचं त्याच्या वडीलांनी सांगितलय.
भारताला मिळवून दिलं तिसरं पदक : पॅरिस आलिम्पिकमधील हे भारताचं तिसरं पदक आहे. यापुर्वी मनु भाकरनं एकेरी आणि मिश्रमध्ये भारताला कांस्यपदक मिळवून दिलं. विशेष म्हणजे स्वप्निल पुरुषांच्या 50 मीटर एअर रायफल 3 पोझिशनमध्ये पदक मिळवणारा पहिलाच भारतीय खेळाडू ठरलाय. त्यानं एकूण 451.4 गुण मिळवत कांस्यपदकाला गवसणी घातली.
![\"\"](\"https://hellokolhapur.com/wp-content/uploads/2024/08/Swapnil-Kusale-1.webp\")