Prakash Abitkar : साखर कारखाना कामगाराचा मुलगा ते कॅबिनेट मंत्री.. जाणून घ्या प्रकाश आबिटकरांचा झंझावाती राजकीय प्रवास

कोल्हापूर | आमदारकीची हॅट्ट्रिक साधल्यानंतर आमदार प्रकाश आबिटकर यांना मंत्रीपदाची सुद्धा लॉटरी लागली आहे. शिवसेनेकडून 12 जणांना मंत्रीपदाची संधी देण्यात आली. यामध्ये कोल्हापूरमधून प्रकाश आबिटकर यांची वर्णी लागली आहे. प्रकाश आबिटकर यांनी 33व्या क्रमांकावर कॅबिनेट मंत्रीपदाची शपथ घेतली. त्यामुळे प्रकाश आबिटकर यांच्या रुपाने प्रथमच राधानगरी मतदारसंघाला कॅबिनेट मंत्रीपद मिळाले आहे.

प्रकाश आबिटकर यांचे वडील आनंदराव आबिटकर हे बिद्री साखर कारखान्यात कामगार होते. त्यामुळे एका सामान्य घरातून आलेल्या साखर कारखाना कामगाराचा मुलगा मंत्री झाल्याने आता त्यांच्यावर सगळीकडून कौतुकाचा वर्षाव होत आहे. तत्कालिन मुख्यमंत्री एकनाथ शिंदे आबिटकर यांच्या प्रचारसभेत राधानगरीचा मंत्रीपदाचा बॅकलाॅग भरुन काढण्याचा शब्द दिला होता. तो शब्द शिंदे यांनी पूर्ण केला असून कोल्हापूरमधून राजेश क्षीरसागर यांचा मात्र पत्ता कट झाला आहे.

प्रकाश आबिटकर याचा पंचायत समितीमधून राजकीय श्रीगणेशा

प्रकाश आबिटकर सन 1997 मध्ये वयाच्या 21 व्या वर्षी गारगोटी पंचायत समितीत अपक्ष म्हणून निवडून आले. पुढे त्यांनी उपसभापती म्हणून काम पाहिले. सन 2002 ते 2007 या दरम्यान कोल्हापूर जिल्हा परिषदेचे सदस्य म्हणून त्यांनी उल्लेखनीय कामगिरी केली. आबिटकर यांनी राधानगरी मतदारसंघातील प्रलंबित प्रश्नांना वाचा फोडण्यासाठी युवा संघर्ष नावाची संघटना स्थापन करून मतदार संघातील न्याय मागण्यांसाठी आंदोलने व मोर्चे काढले. 

प्रकाश आबिटकर यांनी मतदार संघातील जनतेच्या मागणीनुसार 2009 मध्ये विधानसभा निवडणूक लढविण्याचा निर्णय घेतला. या निवडणूकीमध्ये त्यांना पराभव पत्करावा लागला असला तरी 36000 हजार हून अधिक मते मिळाली. सन 2014 सालची विधानसभा निवडणूक त्यांनी शिवसेनेकडून लढवली. यावेळी त्यांनी विद्यमान आमदार के.पी.पाटील यांचा दारूण पराभव करत 1,32,485 इतकी मते मिळवली व जिल्ह्यात विक्रमी 40 हजार हून मताधिक्याने निवडून आले.

त्यानंतर 2014 ते 2019 दरम्यान मतदार संघ व त्यातील विविध प्रश्न मार्गी लावल्यामुळे 2019 च्या विधानसभा निवडणूकीमध्ये दुसऱ्यांदा ते आमदार म्हणून निवडून आले.  प्रकाश आबिटकर यांनी कोल्हापूर जिल्ह्यामध्ये 2019 च्या निवडणूकीमध्ये बाजी मारत शिवसेनेचा गड राखण्याचे काम केले. त्यानंतर आता 2024 मध्ये सलग तिसऱ्यांदा विजय मिळवत त्यांनी आमदारकीची हॅट्रिक साधली.

आमदार प्रकाश आबिटकर यांचा राजकीय प्रवास

• सन 1997 ते 2002  :  सदस्य, पंचायत समिती, भुदरगड
• सन 1997 ते 1998  :  उपसभापती, पंचायत समिती, भुदरगड
• सन 2002 ते 2007  :  सदस्य, जिल्हा परिषद, कोल्हापूर, सदस्य, स्थायी समिती, जिल्हा परिषद, कोल्हापूर
• सन 2008              :  संचालक, भूविकास बँक, कोल्हापूर
• सन 2014 ते 2019  : आमदार, राधानगरी विधानसभा  
• सन 2019 ते 2024  : आमदार, राधानगरी विधानसभा  
• सन 2024 ते 2029  : आमदार, राधानगरी विधानसभा 

प्रकाश आबिटकरांना मिळालेले पुरस्कार 

1. उत्कृष्ठ जिल्हा परिषद सदस्य म्हणून राजर्षी शाहू पुरस्कार.
2. आर.आर.पाटील फौंडेशन, महाराष्ट्र राज्य प्रस्तुत लोकमत विधिमंडळ पुरस्कार यांचा उत्कृष्ट अभ्यासू वक्ता पुरस्कार (विधानसभा सदस्य).
3. 8 व्या भारतीय छात्र सांसद मध्ये आदर्श युवा आमदार पुरस्कार.
4. उपाध्यक्ष, कृषी शिक्षण व संशोधन परिषद, पुणे (MCAER) (मंत्री दर्जा) 
5. अध्यक्ष, सेवा प्रवेश मंडळ (कृषी शिक्षण व संशोधन परिषद पुणे)
6. महाराष्ट्र विधानमंडळ राष्ट्रकुल संसदीय मंडळ शाखेच्या वतीने देण्यात येणारा सन 2019-20 सालचा उत्कृष्ठ संसदपटू पुरस्कार  (विधानसभा) देशाच्या महामहीम राष्ट्रपती द्रौपदी मुर्मुजी यांच्या शुभहस्ते देण्यात आला.