मुंबई | मुंबई महानगरपालिकेच्या शाळांअंतर्गत शिपाई पदाची एकूण १ हजार ७९७ पदे रिक्त आहेत. तर, ३९१ हमाल आणि १२२ माळी आणि रखवालदारांची पदे रिक्त आहेत. शिपाई पदाची एकूण मंजूर पदे २ हजार ६३५ असून रिक्त पदांची संख्या १ हजार ७९७ आहे. हमाल ही पदे ६०२ असून सध्या ३९१ पदे रिक्त आहेत. तर माळी आणि रखवलदारांची १२२ पदे रिक्त असून मंजूर पदांची संख्या २३१ आहे. (Mumbai Mahanagar Palika Recruitment)
आरटीआय कार्यकर्ते अनिल गलगली यांनी शिक्षणाधिकारी कार्यालयाकडे मुंबई महानगरपालिकेतील शाळा अंतर्गत रिक्त पदांची माहिती मागितली होती. या माहितीतून शिपाई, हमाल आणि माळी- रखवालदार यांची पदे मोठया प्रमाणावर रिक्त असल्याचे समोर आले आहे. (Mumbai Mahanagar Palika Recruitment)
प्रत्येक शाळेत शिपाई हे पद महत्वाचे असून मोठ्या प्रमाणावर ही पदे भरली गेलेली नाहीत. त्यामुळे शाळा स्तरावर दैनंदिन कामकाज करण्यासाठी अडचणी येत आहेत. यावर्षी शिक्षण विभागाने निधी वाढवला असून रिक्त पदे तत्काळ भरावीत, असे पत्र गलगली यांनी पालिका आयुक्तांना दिले आहे.