मोठी बातमी: संतोष देशमुख हत्या प्रकरणातील सर्व आरोपींवर मोक्का, वाल्मिक कराडवर का नाही? Santosh Deshmukh Case

बीड | मस्साजोग सरपंच संतोष देशमुख (Santosh Deshmukh) यांच्या हत्या प्रकरणात मोठी कारवाई करण्यात आली असून सर्व आरोपींवर महाराष्ट्र संघटित गुन्हेगारी नियंत्रण कायदा (मोक्का) लागू करण्यात आला आहे. विशेष तपास पथकाने (एसआयटी) ही कारवाई केली आहे. या प्रकरणातील सुदर्शन घुले, प्रतीक घुले, सुधीर सांगळे, कृष्णा आंधळे, विष्णू चाटे, सिद्धार्थ सोनावणे, महेश केदार आणि जयराम चाटे या आरोपींवर आता मोक्काअंतर्गत खटला चालवला जाणार आहे.

संतोष देशमुख हत्या प्रकरणाचा तपास सध्या एसआयटी आणि सीआयडीकडे देण्यात आला आहे. हत्येच्या पार्श्वभूमीवर वाल्मिक कराड (Walmik Karad) याचे नाव मुख्य सूत्रधार म्हणून पुढे येत असले तरी त्याला हत्येप्रकरणी अटक झालेली नाही. तो सध्या खंडणीच्या गुन्ह्यात अटकेत आहे, त्यामुळे त्याच्यावर मोक्का लावण्यात आलेला नाही.

राज्यभर आंदोलने, तपासासाठी दबाव
संतोष देशमुख यांची हत्या अत्यंत क्रूर पद्धतीने करण्यात आली होती. या प्रकरणात लवकरात लवकर न्याय मिळावा, यासाठी राज्यभर जनआंदोलने होत आहेत. या हत्याकांडाच्या राजकीय पार्श्वभूमीमुळे बीड जिल्ह्यासह संपूर्ण राज्यात वातावरण तापले आहे.

मोक्काच्या कायद्याचे महत्त्व
मोक्का हा संघटित गुन्हेगारी रोखण्यासाठीचा कठोर कायदा आहे. एकदा आरोपींवर मोक्का लागला की त्यांना जामिन मिळणे कठीण जाते. या कायद्यांतर्गत खटले विशेष न्यायालयात चालवले जातात. मोक्काच्या कलमांनुसार आरोपींना किमान पाच वर्षांपासून जन्मठेपेपर्यंत शिक्षा होऊ शकते.

धनंजय मुंडे यांच्या राजीनाम्याची मागणी
या प्रकरणात वाल्मिक कराड याचे नाव धनंजय मुंडे (Dhananjay Munde) यांच्याशी जोडले जात असल्याने विरोधकांनी मुंडे यांच्या राजीनाम्याची मागणी केली आहे. तपास निष्पक्ष होईपर्यंत त्यांनी पदाचा त्याग करावा, असे आंदोलकांचे म्हणणे आहे.

राजकीय वातावरण तापले
संतोष देशमुख हत्या प्रकरणामुळे बीड जिल्ह्यातील राजकारण पेटले असून विरोधकांनी राज्य सरकारवर टीकेची झोड उठवली आहे. या प्रकरणाचा तपास किती प्रभावी होतो, हे पाहणे महत्त्वाचे ठरणार आहे.