आता लाडक्या भावांसाठी देखील राज्य सरकारची खास योजना, दरमहा खात्यात मिळणार 6 ते 10 हजार रूपये | Ladka Bhau Yojana
CM Eknath Shinde Special Scheme For Boys : ‘मुख्यमंत्री माझी लाडकी बहिण’ या योजनेला राज्यात उत्स्फुर्त प्रतिसाद मिळाल्यानंतर आता लाडक्या भावांसाठी (Ladka Bhau Yojana) देखील राज्य सरकार खास योजना राबवणार आहे. मुख्यमंत्री एकनाथ शिंदे यांनी आषाढी एकादशीनिमित्त पंढरपूर येथे श्री विठ्ठल रूक्मीणीच्या शासकीय पूजा केल्यानंतर ही घोषणा केली.
‘मुख्यमंत्री माझी लाडकी बहिण’ योजनेतंर्गत 21 ते 60 वयोगटातील पात्र महिलांना शासनातर्फे दरमहा 1500 रुपये दिले जाणार आहेत. 1 जुलै 2024 पासून राज्य सरकारकडून या योजनेची अंमलबजावणी करण्यात येत आहे. या योजनेचा लाभ घेण्यासाठी महिला वर्गाकडून अर्ज भरण्यास मोठी गर्दी सुरू आहे. या योजनेनंतर आता लाडक्या भावांसाठीही मुख्यमंत्र्यांनी खास योजनेची घोषणा केली आहे.
12 वी पास तरुणांना मिळणार सहा हजार – Ladka Bhau Yojana
मुख्यमंत्री एकनाथ शिंदे यांच्या हस्ते आषाढी एकादशीनिमित्त पंढरपुरात श्री विठ्ठल रुक्मिणीची शासकीय महापूजा करण्यात आली. या महापूजेनंतर एकनाथ शिंदे यांनी भाषण केले. या भाषणावेळी मुख्यमंत्री एकनाथ शिंदे यांनी लाडकी बहीण या योजनेनंतर लाडक्या भावांसाठीही खास योजना राबविणार असल्याची घोषणा केली. जो तरुण 12 वी उत्तीर्ण झाला असेल, त्याला दरमहा सहा हजार रुपये दिले जातील. तर डिप्लोमा केलेल्या तरुणाला आठ हजार रुपये मिळतील. तसेच पदवीधर तरुणाला 10 हजार रुपये दरमहिना दिले जातील असे मुख्यमंत्र्यांनी यावेळी स्पष्ट केले.
योजनेच्या लाभ अप्रेंन्टिशिप करणाऱ्या तरूणांना
या योजनेत सहभागी तरुण वर्षभर एखाद्या कारखान्यात अप्रेन्टिसशिप (Apprenticeship) करेल, त्यानंतर तिथे त्याला कामाचा अनुभव मिळेल आणि त्या अनुभवाच्या जोरावर त्याला नोकरी देखील मिळेल. एक प्रकारे आपण स्कील्ड मॅनपावर (कुशल कामगार) तयार करत असल्याचे मुख्यमंत्री एकनाथ शिंदे यावेळी म्हणाले. यामुळे राज्यासह देशातील उद्योग जगताला कुशल आणि तरुण मनुष्यबळ पुरवता येणार आहे. म्हणूनच आपले तरुण त्यांच्या कामात कुशल व्हावेत, यासाठी सरकार पैसे भरणार असल्याचेही मुख्यमंत्र्यांनी सांगितले.
लाडका भाऊ योजनेअंतर्गत, आपल्या राज्यातील तरुण ज्या कारखान्यात काम करतील, अप्रेन्टिसशिप करतील तिथे राज्य सरकार पैसे भरेल अशी माहिती यावेळी मुख्यमंत्री शिंदे यांनी दिली. या योजनेअंतर्गत राज्यातील तरुण कारखान्यात अप्रेन्टिसशिप करतील आणि त्यांना सरकार स्टायपंड देईल.
मुख्यमंत्री लाडकी बहिण योजना काय?
मुख्यमंत्री लाडकी बहिण योजनेला आता दोन महिन्याची मुदत देण्यात आली आहे. त्यामुळे महिलांना आता 31 ऑगस्टपर्यंत अर्ज करता येणार आहे. तसेच 31 ऑगस्ट, 2024 पर्यंत अर्ज करण्यात आलेल्या लाभार्थी महिलांना 01 जुलै, 2024 पासून दर माह रु.1500/- आर्थिक लाभ देण्यात येणार आहे. या योजनेच्या पात्रतेमध्ये आधिवास प्रमाणपत्र आवश्यक असल्याचे नमूद करण्यात आले होते. आता लाभार्थी महिलेकडे आधिवास प्रमाणपत्र उपलब्ध नसेल तर त्या ऐवजी 15 वर्षापूर्वीचे 1) रेशन कार्ड 2) मतदार ओळखपत्र 3) शाळा सोडल्याचे प्रमाणपत्र 4) जन्म दाखला या 4 पैकी कोणतेही ओळखपत्र/प्रमाणपत्र ग्राहय धरण्यात येणार आहे.