अकिवाट दुर्घटनेतील बेपत्ता अण्णासाहेब हसुरे यांचा मृतदेह सापडला; Video पहा | Kolhapur Shirol Flood Accident

कोल्हापूर | अकिवाट दुर्घटनेतील बेपत्ता अण्णासाहेब हसुरे यांचा मृतदेह आज वजीर रेस्क्यू फोर्सला सापडला आहे. काल सकाळी 11 वाजण्याच्या सुमारास अकिवाट-बस्तवाड मार्गावर पाण्याची मोटर चालू करण्यासाठी निघालेला ट्रॅक्टर उलटल्याची घटना घडली होती. याघटनेत सरपंच वंदना पाटील यांचे पती सुहास पाटील यांचा मृत्यू झाला होता. तर माजी जिल्हा परिषद सदस्य इकबाल बैरागदार आणि अण्णासाहेब हासुरे हे दोघेजण बेपत्ता होते यापैकी अण्णासाहेब यांचा मृतदेह शोध पथकाच्या हाती लागला आहे.

पाणीपुरवठा सुरू करण्यासाठी गेलेल्या अकिवाटच्या सरपंच पतीचा बुडून मृत्यू, 2 जणांचा शोध सुरू, 4 जण बचावले | Kolhapur Shirol Flood Accident

कोल्हापूर | शिरोळ तालुक्यातील अकिवाट-बस्तवाड मार्गावर पाण्याची मोटर चालू करण्यासाठी निघालेला ट्रॅक्टर उलटल्याची घटना सकाळी 11 वाजण्याच्या दरम्यान घडली. यामध्ये गंभीर जखमी झालेले सरपंच वंदना पाटील यांचे पती सुहास पाटील यांचा मृत्यू झाला आहे. तर माजी जिल्हा परिषद सदस्य इकबाल बैरागदार आणि अण्णासाहेब हासुरे हे दोघेजण अद्याप बेपत्ता आहेत.

खड्ड्यात चाक अडकल्याने ट्रॅक्टर पलटी : ओढ्यावरून जाताना ट्रॅक्टरचे चाक खड्ड्यात अडकल्याने ट्रॉलीसह ट्रॅक्टर पलटी झाला. यावेळी पाणीपुरवठा सुरळीत करण्यासाठी ग्रामपंचायतीचे कर्मचारी अरुण कांबळे व सागर माने हे लाइफ जॅकेट परिधान करून पाण्यातून चालत वाट काढत जात होते. तर अन्य सात जण ट्रॅक्टर मधून अकिवाट बस्तवाड दरम्यान असणाऱ्या ओढ्यावरील पाण्यातून प्रवास करत होते. यामधील काही नागरिक केळी आणण्यासाठी जात होते.

ट्रॅक्टर ट्रॉलीसह पलटी झाल्याचे दिसताच पाणीपुरवठा कर्मचारी अरुण कांबळे आणि सागर माने यांनी त्यांच्या अंगात लाइफ जॅकेट असल्यामुळे तात्काळ पाण्यात उड्या घेतल्या आणि वाहून जाणाऱ्या आठ जणांपैकी तीन जणांना सुखरूप बाहेर काढले. तर दोघांना रेस्क्यू फोर्सच्या मदतीने बाहेर काढण्यात आले. त्यांना तात्काळ पुढील उपचारासाठी रुग्णालयात पाठवण्यात आले.

या घटनेत सरपंच पती सुहास पाटील यांच्या नाका तोंडात पाणी गेल्याने त्यांचा गुदमरून मृत्यू झाला. सुखरूप बचावलेल्यांमध्ये अकीवाट येथील श्रेणिक चौगुले व रोहीदास माने व खिद्रापूर येथील केळी व्यापारी अंगद मोहीते, अझहर आलासे, प्रदीप पाटील यांचा समावेश आहे.

पालकमंत्री हसन मुश्रीफ घटनास्थळी : शिरोळ तालुक्यातील अकिवाट बस्तवडे ओढ्यादरम्यान घडलेल्या दुर्घटनेनंतर जिल्ह्याचे पालकमंत्री आणि राज्याचे वैद्यकीय शिक्षण मंत्री हसन मुश्रीफ यांनी तात्काळ घटनास्थळी धाव घेतली. त्यांनी सुहास पाटील यांच्या पार्थिवाचं अंत्यदर्शन घेतलं. तर उपचारासाठी दाखल केलेल्या अपघातग्रस्तांची विचारपूस केली. यावेळी खासदार धैर्यशील माने, जिल्हाधिकारी अमोल येडगे, जयसिंगपूरचे माजी नगराध्यक्ष संजय पाटील-यड्रावकर उपस्थित होते. पालकमंत्री मुश्रीफ यांनी मृतांच्या नातेवाईकांना तात्काळ 4 लाखांची मदत जाहीर केली.

शिरोळ तालुक्यातील अकिवाट येथे महापुराच्या पाण्यात ट्रॅक्टर ट्रॉली पलटी, सरपंच पतीसह ७ जण बुडाले Kolhapur Shirol Flood Accident

कोल्हापूर | कोल्हापूर जिल्ह्यातील शिरोळ तालुक्यातील अकिवाट येथे मोठी दुर्घटना घडली आहे. याठिकाणी बस्तवाड वाहतूक मार्गावर महापुराच्या पाण्यात ट्रॅक्टर ट्रॉली पलटी झाल्याने 7 जण पाण्याच्या प्रवाहातून वाहून गेलेत. यापैकी पाच जण बाहेर आले, पैकी एकाचा मृत्यु झाला असून 2 जणांचा शोध सुरू आहे. घटनेची माहिती मिळताच तातडीने एनडीआरएफचे पथक तैनात झाले असून शोध मोहीम सुरू आहे.