कोल्हापूर | दारूच्या नशेत मुलाने वडिलांचा खून करून आत्महत्या केल्याची धक्कादायक घटना उघडकीस आली आहे. कोल्हापूर (Kolhapur Crime) जिल्ह्यातील चंदगड तालुक्यातील देसाईवाडी येथे ही घटना घडली असून यामुळे परिसरात खळबळ उडाली आहे. ही घटना सोमवारी मध्यरात्रीच्या सुमारास घडली असून मनोहर अप्पाजी गावडे (वय ५८) असे खून झालेल्या इसमाचे नाव आहे. तर सागर मनोहर गावडे असे आत्महत्या केलेल्या तरूणाचे नाव आहे.
याबाबत चंदगड पोलिसांनी दिलेल्या माहितीनुसार, गावडे कुटुंबीय मूळचे जांबरे येथील असून चंदगड तालुक्यातील देसाईवाडी (Kolhapur Crime) येथे वास्तव्यास आहे. दोघा बाप-लेकांनाही दारूचे व्यसन असल्याने त्यांच्यात सतत वाद सुरू होता. आई मीनाक्षी यांनी वेळोवेळी मध्यस्थी करून पिता-पुत्रांतील वाद मिटवण्याचा प्रयत्नही केला होता. मात्र, सागर अधिकच व्यसनाच्या अधीन गेल्याने घरामध्ये रोजच भांडणे सुरू झाली होती. अखेर वाद विकोपाला गेल्याने त्याने वडिलांचा खून करून स्वत:ला संपवल्याची घटना घडली आहे.
ही घटना घडण्यापूर्वी रविवारी चंदगड येथील गावडे यांचे पाहुणे सातवणेकर यांच्या घरी बारशाचा कार्यक्रम होता. रात्री उशिरा बारशाचा कार्यक्रम आटोपून मनोहर आणि सागर गावडे घरी परतले होते. मात्र आई मीनाक्षी गावडे आपल्या नातेवाईकांच्याकडेच थांबल्या होत्या. या कार्यक्रमाच्या वेळी सागरने दारू पिऊन तुझ्या नवऱ्याला संपवतो अशी आईला धमकी दिली होती.
घरी आल्यानंतर वडिलांशी वाद झाल्यानंतर सागरने चाकूने मनोहर गावडे यांच्या हातावर वार केला आणि त्यांचा गळा आवळून खून केला. सोमवारी सकाळी मिनाक्षी गावडे घरी परतल्यानंतर त्यांना रक्ताच्या थारोळ्यात पडलेला नवरा आणि तुळईला गळफास लावून घेतलेला मुलगा दिसला. बापलेकाचे मृतदेह पाहून मीनाक्षी यांनी केलेला आक्रोश हृदय पिळवटून टाकणारा होता, दारूच्या व्यसनामुळे संपूर्ण कुटुंबच उद्धवस्त झाल्याचे चित्र यामुळे पाहायला मिळाले.
मीनाक्षी मनोहर गावडे यांनी दिलेल्या तक्रारीनुसार मृत सागर गावडे यांच्यावर खूनाचा गुन्हा दाखल करण्यात आला आहे. दारूच्या नशेमध्ये सागर याच्याकडून खून झाला आहे, या प्रकरणाचा अधिक तपास चंदगड पोलीस करत आहे.
