काळम्मावाडी धरणाला तुर्तास कोणताही धोका नाही; गळतीची केंद्रीय पथकाकडून पाहणी | Kalammawadi Dam

कोल्हापूर | काळम्मावाडी धरण (Kalammawadi Dam) गळती रोखण्यासाठी ८० कोटी रुपयांचा निधी मंजूर करण्यात आला आहे. आज पुण्यातून आलेल्या केंद्रीय पथकाने प्रत्यक्ष पाहणी करत गळतीची तीव्रता आणि उपाययोजनांची आवश्यकता तपासली. धरणाच्या मुख्य भिंतीच्या गॅलरीत जाऊन गळतीची स्थिती समजून घेतल्यानंतर, सिंचनासाठी कोणतीही अडचण न येता हे काम दोन वर्षांत पूर्ण करण्याचा विश्वास पथकातील अधिकाऱ्यांनी व्यक्त केला.

गळतीची पाहणी व निष्कर्ष

३०-४० वर्षांपूर्वी बांधलेली धरणाची मुख्य भिंत कालांतराने झीजत असल्यामुळे गळतीची समस्या निर्माण झाली आहे. केंद्रीय पथकाच्या निरीक्षणानुसार, सध्या धरणाच्या गॅलरीतून व भिंतीतून मोठ्या प्रमाणात पाणी झिरपत आहे. पथकाचे अध्यक्ष टी. एन. मुंडे यांनी सांगितले की, या गळतीमुळे धरणाला त्वरित कोणताही धोका नाही. मात्र प्रत्यक्ष गळती पाहताना काही प्रमाणात धोका असल्याचे संकेत मिळतात.

उपाययोजना पारदर्शक होणार का?

या प्रकल्पासाठी मोठ्या प्रमाणावर निधी मंजूर झाला असला, तरी यापूर्वी गळती रोखण्यासाठी केलेले प्रयत्न कुचकामी ठरल्यामुळे नव्या उपाययोजनांची पारदर्शकता व परिणामकारकता याबाबत शंका उपस्थित होत आहे. भिंतीतून पाण्याचे कारंजे उडताना दिसत असताना, ही समस्या कशी सोडवली जाईल, यावर नागरिकांचे लक्ष लागले आहे.

धरणाची विद्यमान स्थिती

सध्या काळम्मावाडी धरणात २० टीएमसी पाण्याचा साठा असून, गळतीमुळे पाण्याचा अपव्यय होत आहे. त्यामुळे गळती रोखण्यासाठी सुरू होणाऱ्या कामांचे नियोजन व अंमलबजावणी कशी होईल, याबाबत सविस्तर माहिती अद्याप समोर आलेली नाही.

या पाहणी दरम्यान टी. एन. मुंडे यांच्यासह एच. व्ही. गुणाले, एस. एस. पगार, रिजवान ली, आर. एम. मोरे, कार्यकारी अभियंता अशोक पवार, स्मिता माने, सहाय्यक अभियंता प्रशांत कांबळे, विलास दावणे आणि प्रवीण पारकर आदी अधिकारी उपस्थित होते.