Govt. Internship Program 2025: अभियांत्रिकीचे शिक्षण घेणाऱ्या विद्यार्थ्यांसाठी महत्त्वाची बातमी समोर आली आहे. राज्यातील मान्यताप्राप्त अभियांत्रिकी महाविद्यालये आणि विद्यापीठांमध्ये अभियांत्रिकी पदवी व पदव्युत्तर शिक्षण घेणाऱ्या विद्यार्थ्यांना राज्य शासनाच्या जलसंपदा विभागांमध्ये इंटर्नशिपसाठी संधी मिळणार आहे. जलसंपदा विभागाने यासंदर्भातील शासन निर्णय नुकताच प्रसिद्ध केला आहे.
राष्ट्रीय शैक्षणिक धोरण २०२० मध्ये आंतरवासिता उपक्रमाला महत्त्व देण्यात आले असून, अभियांत्रिकी विद्यार्थ्यांसाठी हे उपक्रम लागू करण्यात आले आहेत. नाशिक येथील महाराष्ट्र अभियांत्रिकी शोध संस्था, मध्यवर्ती संकल्पचित्र संघटना, जलविज्ञान व धरण सुरक्षित संघटना तसेच जलसंपदा विभागाच्या क्षेत्रीय कार्यालयांत विद्यार्थ्यांना इंटर्नशिप संधी उपलब्ध होईल. विद्यार्थ्यांना जवळच्या कार्यालयाची निवड करण्याची प्राधान्य देण्यात येईल.
शासन निर्णयानुसार, विद्यार्थ्यांसाठी ५०% जागा महिलांसाठी राखीव असतील. इंटर्नशिप पूर्ण केल्यानंतर विद्यार्थ्यांना प्रमाणपत्र मिळेल, मात्र यासाठी कोणतेही मानधन किंवा वेतन दिले जाणार नाही. मुलाखतीच्या आधारे कार्यकारी अभियंता उमेदवारांची निवड केली जाईल. कार्यकारी अभियंता विद्यार्थ्यांना कामाचा अहवाल देण्याची जबाबदारी असेल. सरकारी कर्मचाऱ्यांना लागू असलेले नियम इंटर्न्ससाठी बंधनकारक असतील.
या इंटर्नशिपमध्ये जलनिर्मिती, उपसा सिंचन प्रकल्प, बांधकाम प्रकल्प, प्रकल्प आरेखन, जलनियोजन व सिंचन व्यवस्थापन क्षेत्रातील कामांचा अनुभव विद्यार्थ्यांना मिळणार आहे.