दिल्ली विमानतळावर वृद्धाला आला हृदयविकाराचा झटका; देवासारखी धावून आलेल्या महिला डॉक्टरने CPR देऊन वाचवला जीव, घटनेचा Video Viral
दिल्ली विमानतळावर एका व्यक्तीला अचानक हृदयविकाराचा झटका आला. दरम्यान तेथे उपस्थित असलेल्या एका महिला डॉक्टरने कार्डिओपल्मोनरी रिसुसिटेशन (CPR) देऊन वृद्ध व्यक्तीचा जीव वाचवला आहे. सदर घटनेचा व्हिडीओ कॅमेऱ्यात कैद झाला असून सोशल मीडियावर हा व्हिडिओ व्हायरल होत आहे.
X वर सोशल मीडिया वापरकर्ता ऋषी बागरी यांनी शेअर केलेल्या व्हिडिओंमध्ये, एक डॉक्टर असलेली महिला जमिनीवर पडलेल्या पुरुषावर कार्डिओपल्मोनरी रिसुसिटेशन (CPR) करत असल्याचे दिसत आहे. बागरी यांच्या म्हणण्यानुसार, या माणसाचे वय ६० पेक्षा जास्त असावे आणि त्याला दिल्लीच्या इंदिरा गांधी आंतरराष्ट्रीय विमानतळाच्या टर्मिनल २ वर हृदयविकाराचा झटका आला होता.
सदर व्हीडीओंमध्ये ही महिला डॉक्टर त्या माणसाच्या छातीवर हात ठेवून जोरात पंप करत असल्याचे दिसत आहे. डॉक्टरनी CPR केल्यानंतर तो माणूस पुन्हा शुद्धीवर आल्याचेही दिसत आहे. व्हिडिओ शेअर करताना कॅप्शनमध्ये लिहिले आहे की, “आज टी २ दिल्ली विमानतळावर, ६० च्या उत्तरार्धात असलेल्या एका गृहस्थाला फूड कोर्ट परिसरात हृदयविकाराचा झटका आला. या महिला डॉक्टरने त्याला पाच मिनिटांत जिवंत केले. भारतीय डॉक्टरांचा खूप अभिमान आहे. कृपया हे शेअर करा जेणेकरुन तिचे कौतूक होईल.“
या व्हीडीओवर लाईक आणि कमेंटचा वर्षाव होत असून “त्या महिलेने अक्षरशः यमराजाकडून काकांचा आत्मा हिसकावून घेतला. तिचा खूप अभिमान आहे,” असे एका युजरने कमेंट करताना म्हटले.
“हे खूप आनंददायी आहे की लोक आपत्कालीन परिस्थितीत मदत करण्यासाठी पुढे येतात. संस्कृतीला सलाम. डॉक्टर तुमचे आभार,” दुसऱ्या युजरने म्हटले.
एका व्यक्तीने ठळकपणे सांगितले की,”केवळ डॉक्टरांनाच नाही तर प्रत्येक व्यक्तीला सीपीआर कसे करावे हे माहित असले पाहिजे.”